இளைய ராஜாவும் ஏழு அடிகளும்

சில மாதங்களாக எதுவும் எழுதாமல் இருந்தேன். இன்று பொட்டுவைத்த ஒரு வட்ட நிலா என்ற பாடலைக் கேட்டேன். பாடல் நின்ற பிறகும் அதன் தாளம் கைகளில் ஓடிக் கொண்டே இருந்ததன் விளைவாக இப்பதிவு 

திருமணத்தின் போது முக்கிய சடங்கு சப்தபதி எனப்படும் தம்பதிகள் இணைந்து ஏழு அடிகள் நடக்கும் சடங்கு.

இசையிலும் ஏழு அடிக்கு முக்கியத்துவம் உண்டு. மிஸ்ரம் எனப்படும் இந்தத் தாளக் கட்டில் ஏழு பீட்கள் (அட்சரங்கள்) உண்டு. தகிட தக திமி என்பது ஏழு அடிகள்; தகிட தக திமி ;// தகிட தகதிமி // 123 12 12 ;// 123 12 12;// என்ற ஜதியில் வருவது மிஸ்ர சாபு என்று கர்னாடக இசையில் அழைக்கப்படும்.

திரைப்பாடல்களில் இந்த லயத்தை அருமையாகப் பயன்படுத்தி இருப்பதில் ராஜா ராஜா தான்.

இந்தப்பாடல் ஆரம்பிக்கும்போது கால்கொலுசின் மூலமும் சின்னி ஜெயந்த் கையில் இருக்கும் பரிட்சை அட்டை மூலமும் தகிட தக திமி என்ற ஜதியை ஆரம்பித்து பாடல் முழுதும் தபேலாவில் இந்த லயத்தை முன்னிறுத்தியிருப்பார் இளைய ராஜா. புரிந்தபின் எளிமையாகத் தோன்றும் . ஆனால் இவ்வளவு எளிமையாக அமைப்பது எளிதல்ல.

படம் இதயம். தபேலாவை உற்றுக் கவனித்தால் இந்த சந்தம் எளிதில் பிடிபடும்.

பொட்டுவைத் த ஒரு
தகிட தக திமி

வட்டநி லா குளிர்
தகிட தக திமி

புன்னகை யில் எனைத்
தகிட தக திமி

தொட்டநி லா .........
தகிட தக திமி

என்மன தில் அம்பு
தகிட தக திமி

விட்டநி லா இது
தகிட தக திமி

எட்டநின் று எனைச்
தகிட தக திமி

சுட்டநி லா .......
தகிட தக திமி

படத்தில் அனைவரும் கிட்டத்தட்டத் தவறாகத் தாளம் போடும் போது முரளி மட்டும் சரியாக இந்த லயத்தைக் கையால் போடுகிறார். அவள் பேரை நாளும் என்ற இடத்தில் . மைக் முரளியாச்சே. சங்கராபரண ராகம் ராஜா கையில் ஆபரணமாக ஜொலிக்கிறது.

இதைவிடக் கொஞ்சம் சிக்கலான அமைப்பு இன்னொரு அருமையான பாடலில். இதே தகிட தக திமி லயம் தான். தபேலாவும் எஸ் பி பாலசுப்ரமணியம் எஸ் ஜானகியின் குரல்களும் இணைந்து லய ராஜ்யம் நடத்தியிருக்கின்றன. அதிலும் தொடக்கத்தில் வரும் சௌந்தர்ய லஹரி மந்திரமும் ஜானகியின் ஆலாபனையும் கல்யாணி ராகத்தில் அமைந்த இப்பாடலைத் தெய்வீக ராகமாக்கியுள்ளன. படம் காதல் ஓவியம்

கண்காட்சி திரைப்படத்தில் வரும் அனங்கன் அங்கதன் என்ற பாடலும் இந்த மிஸ்ர (ஏழு ) ஜதிதான் ஆனால் இலக்கணப்படி கொஞ்சம் வித்தியாசப்படும்.